Boa-Constricktor

Von Ellen Marion Maybell

Es werd immer verrickter
mit der Boa-Constrickter.
Een Konflikter
jagt der annere Konflikter

Immer isse innem Inter-Fressens-Konflikt,
weil se des jeweils Begierde-Objkt
immer gleisch am Sticke verdrickt.
Ob sich des schickt,
des mit dem Am-Sticker-Verdrickt,
dem weicht se aus,
noch nette mo ganz ungeschickt.
Se könnt net annerster.
Weil se ebe so tickt,
so wie se tickt,
wenn se verdrickt.

Un des werd strikt
eingehalte.
Und do dran,
do dran tät se sich halte.
Fragt mer se,
ob‘s ihr nette mo glickt,
des se de Häppsche
Häppsche
für Häppsche
und net gleisch im Ganze nunnerschlickt,
reagiert se gereizt un äußerst ungehalte.

Ständig isse in diese Verstrickunge verstrickt.
Auch wenn se Kihlschränk
und annerstes Gezänk
aach am Sticke nunnerdrickt.
Se wörscht sisch des Zeugs nei.
Un passt’s aach net rei.
Warum net in Scheibe.
Mer musses doch net gleisch
so übbertreibe.
Des is do so was von ungeschickt.
Do kommt noch der Tach,
da isse erstickt.

Diese Verstrickunge,
diese Verquickunge.
Sind doch keene Beglückunge
Sind nur Bedrückunge.

Da schlingt se und schlingst se
in de verschlungene Pfade,
und rückt keen Millimeter
davon ab.
Ums Verrecke net,
nu net gerade.
Se hätt jo kä Flosse
und kä Messersche zum Schneide.
Gut, gib mir, Genosse,
mir Würscheengel,
des Tafelsilber.
Des wär a Freude.
Do hätt’s dich abbe geschnitte.
Komm mir net zu nah.
Dann bist du nämlisch mei Schnitte.

Nee, sacht se.
Isch schlängel mich so durch.
Isch schling mich durchaus
auch ummen Stamm
wie een Lurch
ohne Furch,
do is mir net klamm.
N Halter hab isch jo net.
Wer nimmt schon e Schlang
wie misch mit ins Bett.

Abbe isch häng net in de Seile.
Isch bin net in Eile.
Isch schling mich immer aus der Schlinge,
weil ich’s annners net bringe.
Is ja aach kee Wunner.
Isch schling alles nunner.
Isch wörsch alles nei.
Weil’s ebbe so is, weil’s ebbe so sei.
Bin ebbe e Wörsch-Schlang.
Lauter klee Stücker.
Nee, des dauert mir zu lang.

Des sind halt so mei Inter-Fressens-Konflickter.
Bleibt’s hänge, war’s des. Eure Boa-Constrickter.

*

© 2021 Ellen Marion Maybell
Alle Rechte vorbehalten